Willemstad: Durante un enkuentro ku prensa djaweps 20 di òktober, Fundashon Desaroyo Karnaval Kòrsou (FDKK) a presentá su plannan pa Karnaval 2023.

Ku e slogan “Nos Karnaval”, FDKK ta enfatisá ku e karnaval di Kòrsou ta unu sumamente impaktante i importante i ku henter e komunidat di Kòrsou ta forma parti di e selebrashon. FDKK tin un periodo sumamente kòrtiku (2 luna) pa por organisá tur e aktividatnan konserní segun e mandato di Gobièrnu di Kòrsou. Pa ku esaki a buta énfasis riba e 5 pilánan manera: Apertura, Tumba Hubenil, Elekshonnan, Marchanan di  karnaval i klousura.

Ku e vishon pa den 5 aña hasi e organisashon di karnaval unu independiente i asina krese e produkto karnaval tantu lokal pero tambe internashonal, FDKK a traha un tim konsistiendo di personanan ku hopi eksperiensha riba e tereno karnavalesko. E enfoke di FDKK 2023 ta pa tin un karnaval sumamente struktura kaminda ku kreatividat, ambiente, seguridat i responsabilidat di kompatibilidat lo ta sentral. Riba tèrmino largu nos lo konsentrá pa krese e produkto karnaval i asina oumentá nos mikro pero tambe makro ekonomia durante e periodo aki.

Despues di a reuní ku e diferente stakeholders,  FDKK a stipulá su strategia pa ku karnaval 2023. Esaki lo ta unu ku enfoke speshal pa ku e gruponan di karnaval. Gruponan di karnaval ta sentral den henter e selebrashon di karnaval i nos mester mantené e kalidat di tantu gruponan hubenil i Tiner pa asina tin relevo pa e gruponan di adulto. Maneho di marchanan, kompatibilidat finansiero, uso di teknologia i seguridat públiko ta puntonan sentral, segun Sr. Harms a splika.

FDKK ta konvensí ku Kòrsou lo konosé un Karnaval bunita. Mirando e presentashonnan di diferente grupo di karnaval , no tin duda ku esaki lo ta e kaso.

Apertura di karnaval: 07 Yanüari 2023
Un konsepto nobo kaminda mayoria banda popular, grupo  di karnaval, turista, artista individual i e grupo grandi di fanátiko di karnaval lo partisipá.

Tumba Hubenil: 14 di Yanüari 2023
Pa ku Tumba Hubenil, FDKK a skohe pa enkargá dos hóben konosí ku a bin ta traha huntu i ku hopi éksito den Festival di Tumba. Ta trata di ta srs. Heinrich “Rich Rich” Pieter i Axel Pikero. Punto sentral di Tumba Hubenil lo ta partisipashon i no direktamente kompetensia. Envolvimentu di e mayor lo ta sentral den henter e trayekto di e artista hóben.

Elekshon Reina, Rei, Prens i Pancho: 20,21,22 di Yanüari 2023
Tambe Kòrsou lo tin diferente evento di elekshon pa skohe nos Rei i Reina Tiner, Reina Prens i Pancho Hubenil I Reina, Prens i Pancho Grandi. Sigui medionan di komunikashon pa mas informashon.

Karnaval di Bándabou
Mas aleu a informá ku e aktividatnan di karnaval di Bándabou lo tuma lugá na 2023 i ku e tim di Fundashon Karnaval Bándabou ta den deliberashon i lo konvoka un rueda di prensa spesífiko pa splika kiko e plannan nobo lo ta pa karnaval di Bándabou.  

Marcha di Karnaval Hubenil, Tiner  Adulto
FDKK a enfatisá ku un punto di suma importansha lo ta e maneho di e diferente marcha. Nan ta strukturando henter e proseso di maneho di marcha pa asina yega na un marcha disiplina i ku ménos opstákulo posibel. Un marcha ku ta sali na tempu i ku ménos “buraku” posibel. Un marcha kaminda ku e partisipante no ta sinti  ku ta “kore na ta kore”,  en bes di djump. Esaki ta un proseso ku a inisiá huntu  diferente departamentu manera KPC, Brantwer, Ambulans huntu ku AGKK i AMAK. Tur esaki ta konta pa marcha di Kabai, Hubenil, Tiner i Adulto. Pa ku 2023 e ruta di karnaval ta meskos pero si mester tene na kuenta ku pa 2024 e ruta por kambia. Mas lihé ku ta posibel  lo amplia riba esaki, segun Herman Harms a sigui informá. Wak kalendario di marcha pa e diferente fechanan.

Klousura Karnaval 2023: 25 di Febrüari 2023
Mas aleu FDKK a duna un bista di tur gastunan envolví ku organisashon di karnaval di Kòrsou. Aunke ku karnaval ta haña supsidio di gobièrnu di Kòrsou esaki no ta sufisiente pa karga tur gastu. Pa e motibu aki FDKK ta súplika komunidat speshalmente e fanátiko di karnaval pa aportá ku diferente aktividat di fundraising pa asina FDKK i tambe gruponan di karnaval por presentá den e marchanan. Den mes rosea Sr. Harms a súplika na komersio pa nan tambe aportá. Aunke ku e situashon finansiero i ekonómiko ta difísil Kòrsou tin benefisio na e evento di Karnaval. Nos ekonomia ta fortalesé durante e period aki i nos mester karga e gastunan pa ku esaki huntu. 

Ta un honor ku nos tin e oportunidat di organisá un magno evento manera nos karnaval di Kòrsou. FDKK ta determiná i ta kla pa Nos Karnaval 2023.

Felis Karnaval